23.11.2014

Für hüt hei mir üs mau ume chli Programm vorgnah. Am Morge hei mir no üsi düütsche Nachbare verabschidet u när si mir de mau id Stadt ufbroche. Mir hei de üse Spaziergang zersch mit em Market (wo hie fasch täglech ire grosse Haue stattfindet) afange. Leider isch dä usgrächnet am Sunnti nid u mir si de vor verschlossene Tüüre gstange. Naja. Mir si de no e chliini Chiuche u e grosse Platz mit emene riese grosse künstleche Tanneboum, wo si am schmücke gsi si für Wiehnachte. „Die spinnen doch die Australier!“ Summer und Wiehnachte, das passt iz eifach so öppis vo nid!!! När hei mir no i es bestimmts Reisebüro wöue zum üsi Tour für d Kangaroo Island bueche, da üse liebi Camper dert nid häre darf, hei mir üs entschide e gfüehrti Tour mit em Car zmache…). Leider hei mir de gmerkt, das die am Sunnti gar nid offe hei u mir das dämfau uf morn müesse verschiebe. När hei mir e chliine Spaziergang dür d Stadt wöue mache und verschideni Sache ga aluege. Aber bevor mir würklech hei chönne mit däm afange si mir are mega härzige Chocolaterie verbi cho u hei dert no müesse e churze Zwüschestopp mache. Mir hei de 2 Brandy-Christmaspudding-Praline zum probiere gchouft u hei de no je 2 anderi zum probiere drzuebecho. Chum zur Tüür us hei mir üs de grad az probiere gmacht. Mega fein, bsungers die wo mir gchouft hei.

När hei mir de üse Spaziergang doch mau no agfange. Mir si de zersch am neue und am alte Parlamäntsgebäude verbi cho und si de nach ere churze Strecki am Fluss entlang no uf di anderi Flusssite zur  St. Peters Cathededral. Da mir de doch scho ume es Ziitli unterwägs gsi si, hei sech de langsam üsi Mäge z Wort gmäudet u drum si mir aus nächsts ga Zmittag ässe. Nächhär hei mir am gliiche Ort witergmacht wo mir vor em Ässe ufghört hei u si aus nächschts für Hotsch no ga z War Memorial aluege. Für e Schluss hei mir üs no vorgnah d Aboriginal Cultural Gallery im South Australia Museum ga azluege, da das anschiinend di grössti Sammlig vor Wäut zu däm Thema söu si. Wo mir iz Museum ichecho si hei mir gseh, das grad 10 min speter e Füehrig vomene Volunteer würd stattfinde u de hei mir üs entschlosse doch zersch dert no chli ga zuelose u luege was das Museum süsch no z biete het. Mir hei de mit verschidene Wal- und Delfinarte agfange u si de aus nächsts id Aboriginal Gallery wo är üs sehr viu spannends u vor auem o neus het chönne verzeue. Aus nächsts isch es de witergange mit emene eigentlech versehentlech zchliin gratne Liftschacht, wo si iz sehr cool gnutzt hei: si hei e riise Tintefisch (wo öppe 15 Meter längi Fangtentakle het) über sini ganzi Längi usgsteut, so das mer i jedem Stock e andere Iiblick i di verschidene Wäute i unterschidleche Wassertöifine cha gseh. Ächt cool! Zum Schluss hei mir de no e churze Blick id Usstellig zu Ägypte gworfe. Nach dere Füehrig isch es de scho ume 4i gsi u mir hei di letschti Stung wo z Museum no offe gha het no ir räschtleche Aboriginal Gallery verbracht, wo mir uf dr Füehrig no nid gseh hei. När hei si üs de usegschmisse u drum si mir de haut ume richtig Outo spaziert.

Nach emene churze Zwüschestopp zum 2-3 Sache iichoufe are Tanksteu (da Sunnti isch mache d Läde scho am 5i zue, was mir natürlech nid im Griff gha hei…) hei mir de no e ruhige Abe uf em Camping verbracht.

22.11.2014

Am Morge hei mir aus ersts däicht das üsi Entscheidig vom letschte Abe e gueti gsi isch, wius nämlech zimlech grägnet het (und o grossi Teile vom Tag nid ufghört het). Mir hei de nach em Usschlafe dä Tag mit emene gmüetleche Zmorge startet u hei de när üsi Büecher füre gnah u hei dr ganz Tag nid viu angers gmacht aus abwächselnd z läse, Handygames z spile und Chips z ässe. Gäg e Mittag hets de mau no e Stromusfall wäg emene Gwitter gäh u am Nami hei mir no es gmüetlechs Bierli mit üsne düütsche Nachbare trunke, wo di wahrschiinlech günstigsti Oustraliereis am mache si wo nume möglech isch (z.B. Outo miete für 150.- für e Wuche (aus Rückfüehrig), Flug via Dublin für ca. 500.-/P. (wäg emene Fähler vo dr Fluggsellschaft und Buechig über e portugisischi Homepage),…) Gäg e Abe het de d Kerstin, im Trochne, no e Spaziergang zum nächste Shoppingcenter gmacht u isch no für z Znacht ga iichoufe während Hotsch sech ume sim neue Buech gwidmet het. Nach em Znacht het de Hotsch aus Usgliich z Abwäsche übernah. Für morn steit de ume chli meh uf em Programm wi Kangoroo Islands bueche u Stadt aluege.

21.11.2014

Am nächste Morge (übrigens dr erst Tag vo üsere 3. letschte Oustraliewuche) hei mir de di letschte knapp 500 km bis Adelaide in Agriff gnah wo mir de o gäg em 2 am Nami gschafft gha hei. In Adelaide acho hei mir üs uf d Suechi nach dr Tourist Information gmacht. Das isch leider gar nid so eifach gsi u es het de einiges a Umhärirre u em Gratis-Internet vo Bunnings (so im Stil vo Coop Bau&Hobby) brucht bis mir schliesslech gwüsst hei wo das isch. Leider isch das ir Mitti vore Fuessgänger-Ichoufsstrass gsi u mir hei de e wiiteri haub Stung bruucht bis mir äntlech e Parkplatz gfunge hei wo nid uf 30 min beschränkt gsi isch u nid imene Parkhuus gsi isch (dert passt üse Camper mit öppe 3m Höchi eifach nid iche…). När het vor auem d Kerstin de mau dringend öppis Zmittag bruucht bevor mir de id Fuessgängerzone spaziert si. Ir Touristinformation hei mir üs de mau paar Infos zu Kangoroo Island gholt u mau gluegt was es für Möglechkeite git u was das di einzelne Agebot choste. Leider si aui tüür u mir müesse da mau no chli rächne u no e Nacht drüber schlafe bevor mir üs entscheide was drvo mir wei mache. Z’grösste Problem drbi isch, das üse liebi Camper nid mit uf d Insle darf u mir drum separat es Outo vor Ort müesste miete odr e gfüehrti Tour mache. Zuesätzlech hei mir ono grad paar Informatione zur Stadt säuber gholt u si de mit au dene Unterlage zersch mau ines Strassecafé u hei üs die dert bimene Capuccino und emene Chai Latte mau chli gnauer agluegt. Gliichziitig hei mir üs per Whatsapp und E-Mail übers Gratis-Internet vor Stadt mau ume uf z Loufende bracht.

Das de unterdesse scho langsam Abe worde isch si mir de no schnäu für z Znacht ga iichoufe u si de uf em Rückwäg zum Outo no amene Buechlade verbiglüffe wo Hotsch no einisch e Versuech gstartet het wäg em neue „Helden des Olymp“-Buech. Das mau isch är sogar fündig worde u het sech scho uf viu spannendi Läsestunde gfreut.

Mir si de üses Outo ga hole u si uf e Campingplatz gfahre. Da üse Wassertank nach 2 Täg Wüesti praktisch läär gsi isch hei mir dä no wöue füue, hei de abr müesse merke, das üses Asatzstück für e Schluuch uf em Camping in Norseman isch blibe lige. Auso hei mir üs ar Reception erkundiget bis wenn das z nächste „Bunnings“ offe het u hei de no e churze Usflug dert häre unternah. Uf em Rückwäg hei mir de no bimene „Thursty Camel“ haut gmacht u si üs no es feins Fläschli Wii ga hole.

När hets de haut e chli es späts Znacht gäh, was de o mit drzue gfüehrt het, das mir üs für e nächst Tag mau ume e Ruhetag gönne.

20.11.2014

Reine Reisetag Nommer 3: Die gwöhnigsbedörftige Ziitomstelligsgepflogeheite i dere Region hend zonere liechte Verwirrig bezöglech üsere Weckerziit gführt. Aso ned dass mer üs falsch verstande hend. Aber nochdem mer Zmorge gässe gha hend ond losgfahre send hemmer üs öberleid, was mer eigentlech för en aktuelli Ortsziit hend. Noch dere ¾ Stond, wo mer geschter scho onderwägs omgstellt hend ond nochem Öbertrett noch Südaustralie hend üsi automatisch sech iistellende Handys en eher onerwarteti Ziit aazeigt ond send 1 ¾ Stond vorgspronge. Noch chli studiere – mer hend ghofft, das seg hender üs – hed Kerstin sech dra erinnert, dass Westaustralie kei Ziitumstellig macht aber Südaustralie scho. Trotz dem onerwartet chorze Tag semmer denn doch no fasch 800km gfahre ond hend üses Lager in Kimba, 150km vor Port Augusta, ufgschlage.

(För die, wo üs scho länger folget, wird secher ufgfalle si, dass mer in Port Augusta scho mol die grossi Schleife vo üsere Reis abgschlosse wärdet ha.)

Als Begrüessig ofem Campingplatz heds en lärmendi ond trotzdem iidrocksvolli Flogshow vo grosse Galahschwärm gäh. En Obe met Speli ond Tomatespaghetti hed denn ou dä Tag suber abgrondet. Hoffentlech send üs d’Mogge vom letschte Campingplatz ned gfolgt, well mer beide schiinbar recht beliebt gse send ond chli usgsänd als hätte mer en Bühlesüüch a de Füess, de Bei ond a de Ärm. Das nor als chlises Stossgebät ;-).

19.11.2014

D’Nacht in Norseman esch ned bsonders chorz ond ned bsonder läng gse. Mer hend üs am Vorobe no erkondiget, wenn de hiisigi Supermarkt Töre öffnet ond hend üs drom Mühe gäh, pönktlech am 8i reisefertig ond frösch uftankt vor de Ladetöre zstoh. Nor om denn dert z’läse, dass de Lade ersch am halbi 9i uftued. Naja es Halbstöndli warte hemmer no emmer öberstande. Noch dem mer die nötige Sache ikouft gha hend semmer of üsi ersti Etappe döre beröchtigti Nullarbor.

Leider send die nöchste ca. 730km esch denn nömm vell passiert, osser 3 wiiteri Tankstops, entsprechend vellne Fahrerwechsle, emene feine Zmittag bestehend us de Räschte vom geschtrige Znacht, enere Ziitverschiebig vo 45min (ergendöppis wo sech „zentralaustralische Ziitzone“ nennt) ond chorz vorem Ziel esch üs no trotz lediglech ca. 70m Abstand zom vorfahrende Road Train ond bi voller Gschwendigkeit (110km/h) es usgewachnigs Emu vor de Motorhube öber d’Strass grennt. Es liecht läbesmüeds Manöver. Aber alli beteiligte send meteme liechte Schreck ond alle Gledmasse intakt devo cho.

A de Staats-/ bzw. Gebietsgrenze zwösche West- ond Südaustralie hemmer denn im Caravanpark Plätzli gfonde. Zom Znacht hed d’Kerstin Polenta met Pouletbröschtli bzw. Sojaplätzli anere feine (okay das Wort hani etz denn langsam öberstrapaziert, aber es esch werkli meischtens sehr… fein) Senf-Rahmsauce gmacht.

18.11.2014

De hötig Morge esch recht schnell zämegfasst. Mer send gmüetlech ufgstande ond hend entspannt zmörgelet, well mer hie in Albany no hend welle is Tourist Information Centre go üsi Kenntnis öber die bevorstehendi Wägstrecke go vervollständige ond die ersch am 9i ufmachet. Chorz bevor mer denn aber ufbroche send esch üs no ufgafalle, dass mer of dem Camping gratis Internet hend, wo länget zom no es paar Fötali, Tagebuechiiträg uezlage ond selber no es paar Infos usem Internet z’zieh.

Nach dem mer das erledigt hend, semmer denn is Infozenter ond dert hed üs denn en sehr fröndlechi Aagstellti met de notwendige Infos versorgt.

Churz noch de halbe 11i semmer denn doch no ufbroche...

Was folgt esch denn nömm so spannend gse, osser dass mer of üsere 700km lange Strecki vom Räge verfolgt worde send ond somet üse erschti kompletti Rägetag in Australie iizoge hend. Met abwechslendem Fahre hemmer denn die spannende Öberholmanöver vo Road Trains ond einige Wildtier – 5 Kängerus inklusive sehr chlinem Junior ond liecht läbensmüede Galahs – sehr guet gmeisteret.

Noch de 6e hemmer denn in Norseman en super Caravan Park gfonde, wo üs ou no nochem sonneontergang ond eigentlechem büroschloss freudig iegloh hed. D’Kerstin hed no us de Gmüesräschte en feine Riissalot zauberet – mer mönd för Gränzöberschritige „gföhrlechi“ Güeter abgäh oder verbruche – ond denn semmer früe onder d’Techi kroche.

17.11.2014

Nachdäm mir üse Camper wider Reisefertig gmacht hei si mir zersch im Visitor Center in Walpole ga icheluege, damit mir no paar Infos zu üsne hüttige Plän bechöme. Churz zur Info: D Umgäbig vo Walpole isch bekannt für di riisige Karri-Bäum- und Tingle-Bäum-Wälder. Di Frou het üs de grad e ganzi Tour dür d Gägend uf ene Charte gmalet, wovon abr öppe d Häufti uf unteerete Strasse wär gsi. Mir hei de entschide mir mache zersch e Abstächer zumene chliine Waudabschnitt wo si uf moderni Art e Mischig us ere Kunst und Information mitts i Waud integriert hei. D Kerstin het de natürlech nid chönne lah und het iz dr Bewiis das si tatsächlech es Ängeli isch: Es Föteli mit emene ächt goldige Heiligeschiin… ;-)

Nach däm churze Abstächer hei mir de gfunge mir wette eigentlech gliich gärn e chürzeri Strecki uf unteerete Strasse ga probiere wo anschiinend wunderschön sigi und mitts dür e Tingle-Wald füehrt. Di Bäum si di grösste wiit und breit u chöi bis 75 Meter höch, 25 Meter Umfang und mehreri hundert Jahr aut wärde. D Strass isch de o wunderschön sanft zum Fahre gsi und das isch o mit üsem Büssli kes Problem gsi. Mir hei de no paar Fotostop iigleit u si unter anderem no eine vo de grösste vo dene Tingle-Trees ga aaluege. Ächt iidrücklech. Da chunnt mer sech würklech wine Zwärg vor, umso meh nach 1,5 Mönet Oustralie wo di höchste Gwächs i grosse Teile Büsch si…

Nach dere schöne Fahrt düre Waud si mir de imene Gebiet glandet wo scho fasch usgseht wi z Ämmitau odr z Äntlibuech: grüeni saftigi Wiise mit links und rächts Hügle mit Waud, Chüeh uf dr Weid und e idyllischi Strass dür di Landschaft. Z’einzige was nid passt het: am Strasserand hei si statt Härdöpfu odr Öpfu Avocados verchouft! Ond s’eint oder andere Emu, wo no öber d’Wiise schländeret ;-)

Üse nächsti Stop isch de dr Tree Top Walk gsi. Imene andere Teil vo dene schöne Wäuder hei si e Spaziergang bis 40m i de Boumwipfle installiert. Hotsch isch di Konstruktion zwar chli z wackelig gsi, wiu si hei probiert möglechst wenig vom Waldbode für d Stützine vo däm Wäg z bruuche u heis o tatsächlech uf nume 4m2 gschafft. Di riisige Bäum hei extrem oberflächlechi Wurzle u si dür das bsungers afällig uf Druck uf e Bode u drum das ganze komplizierte Boue. Di einzelne Plattforme si verbunde gsi mit Stahl-Hängebrücke wo de haut im Wind biz gschwanket hei. D Kerstin hingäge het d’Höchi sehr spannend gfonde ond zäme hends denn das richtig gnosse, mau chönne uf di chlinere vo dene Boum-Gigante abezluege…

Nach luftige Höchine isch es de uf festem Bode no uf emene chliine Botanic Walk witergange. Und zum Schluss hei mir üs im Discovery Centre no mit de Insekte und andere Waldbodebewohner vertrout gmacht.

Aschliessend isch es de ume witergange u mir si no bis uf Albany wo mir dr Räscht vom Namittag mit Homepage aktualisiere verbracht hei. Sorry übrigens für di anderi Darstellig vo de Föteli, z angere het irgendwie gspunne und het nume no wiis azeigt…

16.11.2014

Am Morge hei mir nach emene feine Zmorge üsi Sache packt u si mau richtig Höhline gfahre, wos hie im Nationalpark ganz e Huufe git. Mir si de mau zur erste (Carlgardup-Cave) uf üsem Wäg gfahre u hei dert ganz e liebi Frou am Iigang troffe, wo üs Infos zu aune 5 begehbare Höhline Sache gäh het. Mir hei üs de für 2 chli witer südlech entschide u si de wider gange. Üse ersti Stop isch de sozäge e „Adventure-Cave“ namens Giants Cave gsi. Di isch nur sowit touristisch erschlosse gsi, das es es Wägli dür d Höhli gäh het, abr ke Liecht u es het o Passage gha wo mer 5 m Leitere dür ängi Felsspält ufechraxle het müesse und e churzi Passage wo mir fasch hei müesse Robbe. U das aues bim Liecht vo üsne Taschelampe. Das isch de abr rächt interessant gsi u nach öppe 1 Stung si mir de o ume dusse gsi u hei üsi Helme u Taschelampe nocheme churze Röckmarsch döre Wald bim Iigang wider abgäh. Zur Erinnerig het de d Frou am Iigang no es Föteli vo üs beidne aus „Höhleforscher“ gmacht.

Nach ere churze Fahrt si mir de bir „Jewel Cave“ acho. Dert hei mir vor em Iigang usse no gmüetlech e Bire gässe, wo e Japanerin uf üs zue cho isch u üs es gratis Ticket gschänkt het wo si säuber nid bruucht het. So hei mir de ar Kasse nume no es 2. müesse choufe u si de nach ere churze Warteziit, wo mir no d Infos zu dere Höhli gläse hei, i di 2. Höhli iche. Das isch de dr absolut krassi Gägesatz zur erste gsi. Mer het nume mit ere gfüehrte Tour überhoupt ichechönne, d Wäge si vou usbout gsi, das o weniger fitti Lüüt problemlos iche hei chönne und aues Belüchtet. Zum Teil hets sogar no ganzi Liechtshows gäh zum gwüssi Sache zverdütleche odr eifach schön fürezhäbe. Speziell a dere Höhli si vor auem di spezielle Forme vo Stalaktite-ähnleche Formatione:

- bis zu 6m länge, extrem dünne Fäde vor Decki abe, wo zum Teil unger fasch wi nes Pändu verbreiteret si (wo anschiinend bis 8 kg schwär cha si)

- settigi wo usgseh wi Vorhäng, z.T. i de unterschidlechste Farbe wo de schöni Streife bildet hei

- Heliocites: Stalaktite wo sech i aui Richtige ufteile u es Spinnemuster ar Decki ergäbe

Nach dene 2 Höhline hei mir de zersch mau es Zmittag bruucht u si no di churzi Strecki (mir rede scho wi Oustralier was d Distanze ageit, äs si nämlech durchus öppe 20-30 km gsi…) bis zum Lüüchtturm am Cape Leewin gfahre. Dert ar Küste hei mir de zersch Zmittag gässe u när si mir no zum Lüüchtturm u hei üs dert mit Audioguide über d Gschicht vom Lüüchtturm und insbesondere zum Läbe vo de Lüüchtturmwärter informiert. Nach däm öppe 1 stündige Rundgang übers Gländ si mir de no churz z aute Wasserrad ga aluege, wo d Hüüser bim Lüchtturm versorgt het und ir Zwüscheziit eso mit Chauchstei überzoge isch das es so chli ähnlech usgseht wi d Skulptur z Bärn uf em Waisehuusplatz (für aui nid Bärner: grossi Teile vom Rad si nüm erkennbar wiu sone dicki Chauchschicht drüber isch, z Wasser louft a Orte düre wos eigentlech nid sötti und es het e huufe Moos u Alge druf…).

Zum Schluss vo üsem Tag si mir de no öppe 200 km bis uf Walpole gfahre u hei de dert churz nach Sunneuntergang o e hübsche Camping diräkt amene chliine Seeli gfunge wo mir d Nacht verbracht hei.

15.11.2014

Mer send etz definitiv im Süde acho. En fasch scho dorchfrohrni Nacht i dem ornithologische Paradis hemmer dank heissem Kafi am Morge doch no öberstande. Wiiteri Ufwärmig hemmer üs bimene 5km länge Rondgang am Cape Naturaliste gholt. Bim Wandere a de Spetze vo dere Halbinsle hemmer denn ou no chönne es paar Walfesch beobachte of erere Wanderig Rechtig Süde. De Hotsch hed bim ufluege währendem Wandere sogar ei sprengende ond ei wenkende Wal gseh. Ond mer hend veli gseh uftauche ond döreschnufe.

Nöchsti Station esch en chlini Fahrt entlang vo de Eagle Bay gse. Es esch en ongloublechi Bocht met dunkelblauem tiefem Wasser wiiterosse, wo ou Wale schwemmet, türkisblaus Wasser am wiise Strand ond knapp chopfhöche grüne Buschwald.

Chli wiiter südlech a de Küste semmer no d’Canal Rocks go aaluege. Das send Gneisfelse, wo vo de Welle zo iidröckleche Enseli reduziert worde send. Es hed veli Chräbbsli, en riisigi Meeresschnägg ond sogar en Seehund zgseh gäh.

S’lokale Aborigines Cultural Centre hed sech als gschlosse usegstellt. Drom semmer de nach Margret River wiitergfahre. Do hemmer denn no es paar Iichäuf erledigt ond d’Fudge Factory bsuecht. Debi hemmer ou chli chönne öppis probiere. Choclate Orange esch i de Kerstin ere Favorit ond im Hotsch hed Lemon Cheese Cake bsonders gfalle.

Bi fortgschrettniger Ziit hemmer üsi Plän, no chli Wii go z’degustiere om en guete Wiiswii för s’Znacht zfende, of Iis gleid. Trotz fählender, flössiger Abrondig hed Kerstin ou met loufender Nase es super Ässe met pochierte Eier, Rahmspinat ond abrotnigem Lachs gmacht.

Am Obe hemmer üs denn no met Fötali ussueche, läse ond könstlerischer Betätigong verbrocht.

14.11.2014

Am Vormittag hei mir üs de nach ere churze Camper-Wohnigsfüehrig schwären Härzens vor Jenny und em Steve verabschidet. Mir si de witer nach Süde gfahre u hei de no Gebortstag gfiiret: Üses Büsli hed d‘222‘222er-Kilometergrenze öberschrtette! Ca. 7000 Kilometer se vo üs… Am spetere Namittag si mer in Busselton acho u dert ir Tourist Information mau ga Informatione zum Leewin-Naturaliste-Nationalpark hole. Nach däm hets de no es späts Zmittag gäh wo mir z wiitere Programm besproche hei. Mir hei üs de für ne Campingplatz in Dunsborough entschide u hei eigentlech no zure anschiinend schööne Bucht am Meer wöue, hei de abr uf em Campingplatz e Minigolf-Alag entdeckt u hei üs de für die Variante entschide. Bevor mir auerdings si ga spile, hei mir no churz dr Campingplatz erkundet, wo viu verschideni Vögu, z.B. Gäns, Änte, verschiideni Schriitvögu u sogar e „Schuehlöffu-Vogu“ (ke Ahnig wi die richtig heisse, eifach die wone Schnabu hei wine Schuehlöffu) umeglüffe si. När hets de äbe no e Partie Minigolf gäh, wo Hotsch hochhuus gwunne het, abr Spass hets trotzdäm beidne gmacht. När het de Hotsch no es feins Riz Casimir gchochet u d Kerstin het sech ume mau em Tagebuech vo de letschte Täg gwidmet, wo z Perth chli z churz cho isch…

13.11.2014

Für Hüt hei mir es Programm z’Vierte planet gha. Das het sech nämlech guet troffe u sowohl d Jenny wi o dr Steve hei beidi frei gha. Auso hei mir am Morge nach em Zmorge es feins Picnic iipackt u si uf Rockingham gfahre u vo dert mit em Schiff uf d Pengiun Island übere. Uf dere Insle gits e ganz e spezielli Art Pinguine, u zwar d‘ „Little Penguins“, wo nume öppe 55 cm gross wärde. Dert si mir zersch ga luege wi si Pinguine, wo verletzt gfunde worde si u iz us irgendwelche Gründ nüm zrügg id Wiudniss chöi, gfüetteret hei. Näb em Füettere het si no paar zuesätzlechi Informatione zu de Pinguine allgemein u zu de einzelne Pinguine und ire Eigeheite verzeut.

Grad im Aschluss si mir de no mit emene Glass-Bottom-Boat chli usegfahre u hei dert no e Delfin beobachtet, wo uf ene interessanti Art am Jage gsi isch. Är isch nämlech eifach amene Stachuroche nachegschwumme wo im Seegras säuber am Nahrig sueche isch. Aues was dr Delfin drbi muess mache isch warte bis dr Roche Fische, Tintefische u anderi Tier ufschüücht u muess se de nume no packe. Uf ere chliine Insle näb dr Penguin Island hei mir ono 2 Seelöie entdeckt, wo abr leider nume dert gläge si u sech chum bewegt hei.

Zrügg bi de Pinguine hei mir de am Strand es Windgschützts Plätzli gfunge u hei dert gmüetlech Zmittag gässe u d Sunne gnosse. Am Namittag si mir de no churz um d Insle umeglüffe u hei drbi für e Steve no paar Pelikane u für Hotsch no paar, für üs neui, Wasservögu endeckt hei. Ume zrügg bim Bootsstäg si mir de vom heftige Wind scho wider zimlech düregfrore gsi u si de froh gsi wo d Schiff wider cho isch u üs zrügg uf z Festland bracht het.

Wider zrügg ir Wohnig hei mir de überleit wo mir hüt Abe zum Abschluss vo üsere Ziit bi dene Zwöine wei gah ässe. Schlussändlech hei mir üs für nes Mediterrans Restaurant ir Stadt, e Empfählig vore Fründin vor Jenny, entschide. Das isch de o e wunderschöne Abe mit absolut sensationellem Ässe, guetem Wii u unschlagbarer Gsellschaft worde! E super Abschluss vore coole Ziit da in Perth.

12.11.2014

Hüt morge hei mir üs bemüeht üs am Morge früech usezschliiche, da mir e Usflug uf d Rottnest Island planet hei, u üsi Gastgeber nid hei wöue wecke. Da mir no dr chli Umwäge gfahre si, wiu d Schiuder nid so klar gsi si, si mir de scho rächt spät dranne gsi wo mir dr richtig Parkplatz für d Fähri erreicht hei. Während d Kerstin dr Rucksack packt het, isch Hotsch uf d Suechi nach em Billet-Schalter. Leider het är nume dr Iigang vom Aquarium gfunge, abr ke Billet-Schalter. O e Fähri hei mir niene gseh… Ungerdesse isch natürlech d Abfahrtsziit vor Fähri scho düre gsi u mir hei entschide zum andere Fährihafe mitts ir Stadt zfahre u dert di nächsti ire Stund znäh. Dummerwiis si mir natürlech mitts im Stossverchehr glandet u si chum vorwärts cho. Wo mir de nach 50 Minute geng no nid ir nechi vom Hafe gsi si, hei mir gwüsst, das mir o die wärde verpasse. Auso si mir ume umkehrt u si zrügg zum andere Hafe wo mir haut statt d Fähri am haubi 8i iz die am 10i aagstüüret hei. Das mau si mir zwar e Stung zfrüech dert gsi, hei de abr Ziit gha zum das Büro sueche, wo so unuffällig agschribe gsi isch, das es scho fasch gemein isch u hei de nach em Sandwich mache o usegfunge wo di Fähri fahrt: nämlech hinter em Büro um 2 Huusegge ume, so das mer se vom Parkplatz unmöglech hätti chönne gseh…

Mir hei de di gmietete Velo id Fähri verlade u öppe 45 min speter si mir de doch no uf Rottnest Island acho. Mit de Velo si mir de zu üsere Inselumrundig ufbroche. Bi eim vo de erste Stopps zum Fötele u Informationsschiudli läse hei mir de o e Gruppe „Quokkas“ aatroffe, das isch e chliini Wallaby-Art wos nume uf Rottnest Island git. Di si so zahm gsi das si d Mönsche neugierig si cho beschnuppere u sech sogar gnüsslech hinter de Ohre hei la chräbbele ;-)

Uf dr andere Site vor Insle si mir de no dr Lüüchtturm ga aaluege u si ono di 155 Stufe bis z’oberst ufegstige zum vo dert e super Blick über di ganzi Insle z becho. Bi däm Lüüchtturm hei mir de ono Zmittag gässe u hei de när di 2. Häufti vo üsere Rundi i Agriff gnah.

Churz vor em Ändi isch de Hotsch no churz iz Wasser u het no e Versuech gstartet mit Schnorchle, het de abr relativ schnäu ufgäh wius trüeb gsi isch u mer nid viu gseh het.

Zum Schluss hei mir üs de no e Glace gönnt u während Hotsch no paar Informationstäfeli gläse het, het d Kerstin Müeh gha es Quokka drvo z überzüge das Glace nüt isch für chliini Kängurus isch u hets de stattdesse während öppe 10 Minute uf em Schoss gstriichelet. När isch de d Fähri scho ume gfahre u mir heis Quokka leider müesse zrügglah. L Wär doch es cools Huustier…

Uf dr Fähri hei mir de no es cools Erläbnis gha, wiu plötzlech hinter üs Lüüt ufgregt hei afange juble u wo mir si ga luege hei mir öppe 5 Minute lang no e iidrücklechi Show vo 2-3 Wale, wo immer und immer wider zum Wasser usgumpet si, hei chönne bestuune.

Dr hüttig Abe hei mir de eleini ir Wohnig vom Steve u dr Jenny verbracht wiu beidi hei müesse schaffe u d Kerstin het di Chance gnutzt u het nach 1,5 Mönet Entzug dr Bachofe gnutzt u het e Zwibele-Chäs-Chueche gmacht. Hmmmm fein!!!

11.11.2014

Dr Vormittag hei mir, nachdäm mir nach däm länge Abe gester usgschlafe gsi si, zäme mit em Steve verbracht. D’Jenny het hüt leider scho am Morge müesse schaffe u isch scho wäg gsi. Gäg e Mittag hei mir de üses Outo gnah u si i Kings Park. Dert hei mir zersch z Chriegsdänkmal vom 1. u 2. Wäutchrieg agluegt u hei drbi gmerkt, das hüt grad Gedänktag für e 1. Wäutchrieg isch. Zum Glück isch dr offizielli Teil dert scho düre gsi u di grössti Mönschemängi isch scho wider wäg gsi, so dass mir in Rueh dr Räscht vom Park chönne aluege. Zersch si mir es Stück dür e Botanisch Garte u de über ne Glasbrügg uf d Höchi vo de Boumwipfle ufe u hei vo dert d Ussicht über d Stadt gnosse. Vo dert us hei mir de ono üsi ersti Schlange in Oustralie gseh (Zoo zeut schliesslech nid!), hei se abr nid gnauer chönne identifiziere. Usserdäm hei mir ono dr eint odr ander Vogu gseh wo mir vorhär no nie gseh hei. Chli witer im Park inne si mir när no dr DNA Tower ga aluege. Das isch e Turm wo wine DNA us zwöi doppulöifige Sträng/Stäge ufbout isch u vo wo mer e guete Blick uf di anderi Siite vor Stadt gha het. Bevor mir de ume zrügg zum Outo si hei mir no dr 2. Teil vom Kings Park, z Bushland, ufemene churze Spaziergang erkundet.

Am Namittag hei mir üs e 12 km Rundi um e Swan River vorgnah. Die hei mir abr zur Abwächslig nid z Fuess, sondern ufemene gmietete Tandem gmacht. Dr Velowäg wo a de meiste Ort diräkt am Fluss entlang gange isch, isch meistens mitts im Grüene gsi und mir si umringt gsi vo diverse Wasservögu. So hei mir de o paar Foto-Stops müesse iilege u hei de o di iidrücklechi Skyline vo Perth vor andere Flusssite bewunderet. Zum Schluss si mir de no mit em Tandem uf d‘ Heirisson Island, ere Insle ir Mitti vom Swan River wos e Gruppe Australian Grey Kangoroos git. Mir hei de zwar nume eis Känguru gseh abr es isch trotzdäm schön gsi.

Am Abe hei mir de no einisch dörfe dr Jenny iri Chochkünst gniesse u hei üs bi ihne scho fasch deheime gfüut.

10.11.2014

Am Morge hei mirs gmüetlech gnah u si de no di räschtleche 200 km bis Perth gfahre. Dert si mir wi immer zersch id Tourist Information u hei dert di nächste Täg planet. Usserdäm hei mir no versuecht dr Steve z’erreiche – e Kolleg vo Hotsch wo vor Schwiiz uf Perth usgwanderet isch. Leider hei mir ne nid verwütscht u si de haut zersch ga Zmittag ässe. När si mir de ufene Stadttour. Mir hei nämlech erfahre, das es hie Stadtfüehrige zu verschidene Theme git wo vo Freiwillige gratis gmacht wärde, u das jede Tag zwöi Mal! Da mir no chli früech dranne gsi si, hei mir no versuecht für Hotsch z’neue Buech vo „Helden des Olymp“ zfinge. Leider hets dä Buechlade wo mir gfunge hei nid gha. Naja, de warte mir haut bis es aus E-Book usechunnt…

Bim Träffpunkt für d Füehrig hei mir de üse Guide, d‘ Helen, troffe u mit ire zäme hei mir öppe 2 Stung lang historischi Gebäude agluegt u si het üs Gschichte drzue verzellt. Das ganze isch sehr interessant gsi, o wes mängisch ächt schwirig gsi isch se z’verstah wiu si so liislig gredt het. Sehr iidrücklech isch bi dere Stadt das diversi auti Backstei-Hüüser schön erhaute worde si, aber ungerdesse umringt si vo top-moderne Glas-Hochhüüser! Isch sehr e spezielli u für üs ungwohnti Asicht.

Nach dere Füehrig si mir no einisch zrügg zur Tourist Information wo mir no einisch z’Internet aazapft hei us Hotsch no einisch bim Steve probiert het. Das mau hets klappet u statt öppis für di nächste Täg abzmache si mir grad zum Znacht u zum Übernachte bi ihne iiglade worde…

Nach erste Erfahrige im Fiirabeverchehr z Perth hei mir de nach rächt langer Ziit üses Ziu doch no erreicht u hei de e mega gmüetleche Abe bim Steve u dr Jenny dörfe verbringe.

9.11.2014

Höt hemmer üs weder mol ned allzovell Stress gmacht. Well mer för d’WC Schlössel gfasst hend, wo’s Depot drof ghä hed ond mer das weder ersch bi Büroöffnigsziit zrog bechonnt. Aber das hed üs i dem Fall nüd usgmacht.

Mer send denn uf de Highway ond Rechtig Nambung National Park gfahre. Nocheme Tankstop of halber Strecki hemmer no e Halt gmacht. I de Jurien Bay hemmer denn en Zwöschehalt gmacht. Die Bocht esch en Teil vomene öber 150 km länge Marine Reserve, wo do a de Westküste iigrechtet worde esch, woren die lokali ond bedrohti Tierwelt sell Zueflocht fende ond hie sette sech Seelöie im Wasser tömmle. Aber leider hemmer nüd so gfonde.

De Hotsch hed denn no d’Elias 1 ändlech chönne vom Stapel loh. Aber gwössi Planigsfähler hend denn wahrschinlech zomene kentere vom Scheff gfüehrt. Zom Glöck esch dä Prototyp jo no onbemannt gse.

Als wiitere chline Halt semmer no chorz om de Lake Thetis spaziert. Das esch en andere Urtömpel, wo met anderthalbfachem Meeressalzghalt gsägnet esch, ond Stromatolite sech hie am Ufer ond öppe 1.5m onder de Wasseroberflächi ähnlichi Mikrobesoppe hed chönne bilde. Zusätzlech send do no velli Insekte ufgfalle, wo vo dere Soppe läbed ond wiiteri Tier, wie en Blue-tongue Skink, Eidechsli ond Vögeli. Apropos Insekte: Vell z’vell Flöige!

Im Nambung National Park hemmer üs denn zersch ofeme Desert Drive d’Pinnacles aagluegt, im Interpretive Centre öber Gschecht, d’Natur ond Geologie informiert ond denn hemmer üs ofere Sparziergangsschleife die Kalksteinfelse no mol chli gnauer betrachtet. Es send mehreri tuusig Felse, wo vo de Iigeborene langi Ziit gmede ond ersch vor 50 Johr so rechtig entdeckt worde send.

För s’Nachtlager semmer denn no wiiter nach Lancelin gfahre, wo mer no en umwerfende Sonneufgang hend chönne verbrenge.    

8.11.2014

För Höt hemmer üs weder mol chli Wandere vorgno.

Nocheme feine Zmorge ond ere erfröschende Duschi semmer zo de Küste gfahre. I dem Teil vom Nationalpark hemmer atemberaubendi Kliffs vo Miliarde Johr altem Kalk- und Sandstei chönne of 3 oderschedlech länge Wanderige während ca. 3 Stond gniesse. Bi rächt starchem Wend send bsonders d’Flogkönst vo de lokale Schwälbli, Möwe ond de wenzige Falke wos do ged recht iidröcklech gse. Aber ou d’Felse selber hend zom einte oder andere Fötali aagreget.

No chorz uftankt ond mer hend üs weder ofe Wäg gmacht. En australischi Kuriosität hemmer denn bimene chline Abstächer ou no chönne bewondere – espersönlechs Highlight vo de Kerstin – en pinke See! Lueget d’Fötali a. Mer gloubts ned.

Nach wiitere 200-300 km hemmer üses Lager in Geraldton gfonde, wo mer üs no rasch om Iichouf ond om d’Wösch vo de letschte 2 Woche kömmeret.

Zom Znacht hed denn d’Kerstin no Crêpes met Custard ond Erdbeeri gmacht.

7.11.2014

Neue Tag, neus Glöck. De Hotsch esch usgschlofe ond d’Kerstin fühlt sech so fit wie emmer. Am Morge hemmer üs de verpasste Wanderig vo geschter gwindmet. Das esch en 3km längi Rondi, wo mer aber ned am Afang achond, sondern e chli wäg devo am Strand ond denn zrog zom Campingplatz hed müesse loufe. Grad of de erschte Meter hemmer scho chli Wildtier ufgschreckt. Noch chli beobachte, hed sech usegstellt, dass es nor es paar Geisli gse send (Setts do zwor eigentlech keni meh gäh, well die gezielt gjagt wärde). Onderwägs send üs den no es paar schöni Schwanzfedere-wädelndi Vögel begägnet. Leider esch vo dere gros beschrebne, vellsiitige Vogelwält ned vell deheime gse. Deför hed üs denn es grosses Krabbeufgebot ofem Röckwäg am Strand entlang begleitet ond en chlini Groppe vo Pelikane esch no vo de Delfinfüetterig zrog blebe.

Etz hemmer s’Züüg packt ond send weder Rechtig Süde ufbroche. Als erschte Stop esch höt d’Shell Beach ofem Program gstande. Das esch en Strand am Hemelin Pool – en halbabgschotteti Bocht met doppelt so hochem Salzghalt wie normalerwis im Meer – ond drom geds do ned allzovell anderi Tier, wo chönd öberläbe. I de lettschte 3000 Johr heds de die leere Muschle vo de abgstrobne Tier fasch 10 m höch, 1 km breit ond 20 km läng zomene Art en Stei möge zämedröcke. En ungloubleche, wiise Strand nor us Möschali bestehend… Als nöchsts semmer denn zo de Stromatolite. Das send Mikrogebilde, wo’s of de Erde inere ähnleche Form scho sett meh als 3 Milliarde Johr ged. Im spezielle betrefft das Cyanobakterie, wo för de erschti Aasteg vo Suurstoff i üsere Athmosphäre verantwortlech gse send ond als eini vo wenige Läbewese zom Öberläbe i so onwerkleche Bedenginge fähig se.

Noch dem biologische Aschauigsonderrecht hemmer üs denn weder of d’Socke gmacht ond send noch Kalbarri gfahre. Chorz bevor mer i s‘Dorf ie gfahre send, semmer no imene ghörnte Tüüfeli öber de Wäg gloffe. De Thorny Devil esch en uf d’Wüesti aapassti Eidechse. Im Hotsch sis Lieblingstier…

Am Obe semmer de no imene lokale Restaurant Fish’n’Chips ond en Pizza go ässe.

6.11.2014

Hüt morge si mir ume früech ufgstande wiu mir am Viertu vor 8i hei wöue ga luege wi das mit em Delfine füettere louft. Ir Shark Bay hets insgesammt öppe 2000 Delfine, vo dene hets e Gruppe vo 21 wo immer vor dr Küste vor Monkey Mia unterwägs isch u o bis ad Küste chöme. U vo dene 21 hets ganzi 5 wo sech vo sich us fasch täglech bis zu 3x löh la füettere. Früecher hei si se no düütlech hüüfiger u mit grössere Mängine gfüetteret bis si i de 90er Jahr gmerkt hei, das si ihres natürleche Verhaute verlöh u das vor auem di Junge gar nüm lerne Fische zjage. Das het de ire extrem höche Stärblechkeit vo de Jungtier gändet, voruf das si iz ganz genau druf luege, das jede Delfin maximal 3x am Tag und insgesammt nid meh aus 1,5 kg Fisch bechunnt (Tagesbedarf isch bi öppe 6-8 kg). Sit dene Massnahme het sech d Stärblechkeit wider normalisiert u d Delfine läbe witerhin aus Wiudtier (es isch drum o verbote se azlänge u z Streichle). Soviu zur Info.

Mir si de auso ab a Strand u hei dert bir erste Rundi leider nume chönne zueluege wi anderi dörfe füettere. Es isch trotzdäm sehr iidrücklech gsi Delfine chönne z bewundere wo bis iz ganz flache Wasser chöme u z.T. 1-2 m vo eim entfernt si. Öppe e haub Stung speter isch de es Grüppli Delfine zum 2. Mal uftoucht u dasmau het d Kerstin Glück gha u het o e Fisch becho u dä dörfe füettere. Cool!!!

Im Aschluss si mir de zu üsem Boot glüffe, da mir für hüt no einisch e Bootstour buechet hei. Zersch isch es de mit em Katamaran zure Perlfarm gange, wo mir erklärt u zeigt becho hei wi das mit dr Zucht vo Salzwasserperle funktioniert. Ungloublech, dass es öppe 10 Jahr und extrem viu Arbeit bruucht bis mer würklech schöni perfekt gformti Perle cha „ärnte“! Nach däm si mir de es Stück uf z Meer usegfahre u uf „Dugong“-Safari. Di gmüetleche Meeressäugetier ernähre sech vo Seegras u si drum ir Shark Bay (wos ke Koralleriff meh git, drfür riisigi Fäuder mit Seegras) so zahlriich mit öppe 15‘000 Tier. Mir hei de o nach churzer Ziit scho di erste gseh uftouche zum Lufthole u hei fliisig versuecht gueti Föteli zmache. Zwüsche de Dugongs hei mir ono di einti oder anderi Schildchrott und paar Delfine gseh. När si mir de ume zrügg nach Monkey Mia.

Am Namittag hei mir eigenlech no chli wöue ga loufe, das isch de abr iz Wasser gheit wiu Hotsch plötzlech Migräne becho het u so het sech de d Kerstin mit Reisetagebuech schribe (ja, unter anderem so usfüehrlech hüt), läse u Versüech e Delfin z zeichne verbracht.

5.11.2014

Am Morge hei mir de üsi Sache zämepackt u si diräkt witergfahre bis id Shark Bay. Dert hei mir de zersch in Denham e Stopp gmacht u hei üs mau wider ir Tourist Information über d Gägend informiert u üsi nächste Täg planet. Si hei i däm Informationszäntrum zuesätzlech no es Museum gha, wo de üses Programm füre Namittag worde isch. Näb dr Gschicht mit Schafzucht, Obstfarme und relativ früech o em Tourismus hei mir dert o viu über z Naturschutzgebiet erfahre, insbesondere über d Tier wo hie vorchöme. Näb ere riisige Kolonie Dugongs, de Delfine u natürlech de Haie, gits hie diversi Insle, wo mehreri chliini Säugetierarte (z.B. e spezielli Wallabie-Art) vorchöme, wos süsch niene uf dr Wäut meh git.

Mir hei üs de entschide im Monkey Mia Resort di nächste 2 Nächt z verbringe, so das mir üs Delfine chöi aluege u no einisch chöi e Bootstour mache.

Nach emene churze Spaziergang am Strand si mir de no gmüetlech es Bier ga trinke, bevor mir dä Abe mit emene fein Znacht hei lah usklinge.

4.11.2014

Am Morge si mir de no einisch ga luege obs hüt mit em Wind besser usgseht u mir doch no chöi e Bootstour mache. Das mau hets dütlech besser usgseh u mir hei sogar no di fählende 2 Lüüt atroffe wos no bruucht het das si Tour überhoupt mache. Schlussändlech si mir de 6te uf em Schiff gsi u si über d Koralleriff uf z Meer usegfahre. Unterwägs hei mir wiu über d Koralle hie glernt, wo zum Teil ächt lustigi Näme, wi z.B. Cabbage Coral (di gseht würklech us wine überdimensionierte Chabis-Chopf!) hei. Witer usse hei mir de e erste Stopp gmacht zum Schnorchle bi Koralle wo fasch bis zur Wasseroberflechi cho si u mir hei dert ume ungloublech viu verschideni Fische gseh und sogar no e grüeni Meeresschiudchrott. Bim zwöite Stopp, dasmau amene biz töifere Ort, hei mir de v.a. e grossi Gruppe „Long Toms“ troffe (das si Fische di gseh chli us wine Stäcke: Öppe 1,5 m läng abr nume öppe 10-15 cm Durchmässer). När si mir ume zrügg zum Strand gfahre.

Bevor mir mit em Outo si witergfahre si mir am Strand no chli füreglüffe. Grad wo mir hei wöue umchere u zrügg zum Outo loufe si üs ganz e huufe Roche im Wasser ufgfaue, unter anderem wunderschöni orangi mit blaue Fläcke (sorry dr Name hani vergässe, irgend öppis mit „blue-spotted …).

När si mir de witer bis nach Carnavon gfahre. Dert hei mir üs e Campingplatz gsuecht u hei de sogar eine gfunde mit Internet, so dass mir üs dr Wäg id Bibliothek hei chönne erspare. Dr Abe hei mir de drmit verbracht üsi Homepage mau ume z aktualisiere.

3.11.2014

Nach em Ufstah hei mir de gmüetlech üsi Sache zämepackt u si no einisch für ne Rundi Schnorchle zur Turquoise Bay gfahre. Dert hei mir de zersch no paar wenigi Meter vor üs emene Emu-Pappi mit 2ne Junge chönne zueluge bim grase. Nach däm das die witerzoge si, si mir de a Strand u hei üsi Flosse u Toucherbrüue ume agleit u si iz Wasser. Das mau si mir mau chli witer usegschwumme aus gester zum luege was mir dert so finge. Nachdäm mir üs um Koralle ume- und drübergschlänglet hei wo bis fasch ad Wasseroberflächi cho si, hei mir dert usse riisigi Koralle atroffe wo zum Teil e Durchmässer vo meh aus z dopplette vo eim vo üs beidne gha hei. Ungloublech gross! Fische hei mir ume ganz e huufe gseh, abr uf Schiudchrotte odr Roche si mir nüm gstosse. Während d Kerstin när chli id Sunne gläge isch zum sech ume ufwerme het Hotsch no chli d Füess im Meer badet. Während däm das är dert gstande isch, isch sogar e chliine Haifisch (wahrschiinlech e Riffhai) a ihm verbi gschwumme. Wo är när mit dr Kamera u dr Toucherbrüue no einisch iz Wasser isch, isch är abr leider scho verschwunde gsi. Vom Informationszäntrum hei mir erfahre das es hie zwar sehr viu Haie git, abr eigentlech nume Riffhaie, wo für Mönsche praktisch immer ungfährlech si u zudem sehr schüüch u meistens gseht mer se gar nid.

Nach däm Erläbnis si mir de zrügg zum Outo u si zrügg uf Exmouth, schnäu ga tanke, u denn witer Richtig Coral Bay. Mir hei de paar Kilometer usserhaub vo Exmouth no e churze Zwüschestopp am „Pebble Beach“ gmacht. Das isch e Strand wo im Gägesatz zu de räschtleche Stränd i dere Region nid us Sand sondern us rund gschliffne grobe Chisusteine i aune Farbe besteit.

In Coral Bay hei mir üs zersch e Campingplatz gsuecht u si üs när ga erkundige wi das usgseht mit Bootstoure im Riff imene Schiff mit Glasbode, wo mir in Exmouth eigentlech scho hei wöue mache, abr die saisonbedingt nüm gmacht worde si. Hie hei mir de erfahre, das es im Momänt wäg em Wind vo Tag zu Tag neu entschide wird ob sis mache odr nid u das mir doch morn morge söue cho luege obs öppis git…

Dr Räscht vom Nami hei mir de mau ume fridlech mit emene guete Buech ir Sunne verbracht u Hotsch het de no fein Znacht gchochet während däm d Kerstin sech um z Tagebuech kümmeret het.

2.11.2014

Hüt morge si mir früech los, wiu üs d Frou uf em Campingplatz gseit het am Morge am 8i sigi Fluet u am einte Ort cha mer nume bi Fluet überhoupt ga schnorchle. Uf em Wäg dert häre hei mir de scho paar Stop müesse mache wäg ere grosse Echse wo über d Strass spaziert isch u paarne Adler wo diräkt näb dr Strass ghocket si. Wo mir de am Schnorchu-Plätzli acho si het Hotsch ersti Bedänke güsseret ob äch würklech iz Fluet isch, wiu aues extrem flach usgseh het. Mir hei de beschlosse zersch no einisch 15 km zrügg zfahre u im Informationszäntrum wo ungerdesse ufgange isch ga nachezfrage. Dert hei mir de erfahre das erstens Fluet am Morge am 4i gsi wär und usserdäm d Geziite bis am Mittwuch z schwach das d höchi vom Wasser würd länge zum Schnorchle. Aber es git ono d Turquoise Bay wo o wunderschön sigi…

Mir hei de entschide i däm Fau zersch no di einti Schlucht ga azluege bevors ume Mittag wider heiss wird. Wo mir dert acho si isch auerdings uf em Wägwiiser gstande das d Strass gschlosse sigi… Na super, hüt wott irgendwie nüt so wi mir!!! Mir hei de beschlosse das di Zuefahrtsstrass nach dr Charte maximal 2 km läng cha si u mir doch eifach z Outo ar Houptstrass löh lah stah und eifach z Fuess göh. Schliesslech isch Sunnti, auso schaffet eh kene a dere Strass, u drzue heissts ja niene das dr Wanderwäg o gschlosse isch… Das het de o aues wunderbar klappet u mir nach emene steile Ufstiig e wunderschöni Ussicht über d Schlucht, d Küste u z Ningaloo Reef gha. När si mir üses Outo ume gah hole, wo brav uf üs gwartet het u si zrügg iz Informationszäntrum wo mir d Ziit übere Mittag (wo mir wäg dr Sunne nid hei wöue am Strand verbringe) mit chli Biudig zu de Koralle, Fische u süstige Tier im Riff hei verbracht.

Im Aschluss hei mir iz doch äntlech no wöue id Turquoise Bay ga schnorchle. Mir si chum im Wasser gsi si mir scho vore ganze Gruppe Fische umringt gsi u das obwou mir ersch im Sand si gsi. Öppe 10 m usserhaub het de z Koralleriff agfange u mir si us em Stuune ab au dene verschidene Fische, wo da paar Meter vor dr Küste läbe, nüm usecho. Vo ganz chliine blaue Fischli wo sech in ganze Schwärm in Koralle versteckt hei, sobaud mer chli necher häre gschwumme isch, bis zu öppe 1,5 m länge rägebogefarbige Fische wo i eire Gmüetlechkeit d Koralle abgraset hei (u das het mer im Wasser mega luut ghört). Wiu d Kerstin de langsam düregfrore gsi isch, si mir de ume Richtig Strand üs ume ga ufwerme. När isch es de zure 2. Rundi losgange. Das mau hei mir chum im Wasser e Schiudchrot entdeckt u si dere e Ziit lang nachegschwumme u hei mit üsere gester gchoufte Unterwasser-Wägwärfkamera versuecht es guets Biudli vore z becho. Luege mer mau wi d Biuder de usechöme… När si mir no chli wiiter usegschwumme u hei vor üs plötzlech e Roche (mir näme a es isch e Stachu-Roche gsi) gseh. O däm si mir e Momänt gfougt u ihm zuegluegt bevor mir üs wider de andere Fische, Koralle u Muschle gwidmet hei. Nach däm 2. Schnorchle si mir de ume zrügg uf üse Campingplatz vo gester u hei dert gmüetlech Znacht gässe. När hei mir eigentlech no einisch a Strand wöue ga luege ob mir no ere Schiudchrot gseh wi si an Land chunnt zum Eier lege, abr mir si de beidi z’müed gsi zum no einisch mit em Outo zfahre u heis de haut lah si.

1.11.2014

Nach em Zmorge hei mir zersch e churze Spaziergang zu paarne Sanddüüne gmacht wo nach vo däm Hof lige. Während em Loufe hei mir üs in Fährteläse güebt u hei grätslet was für Tier das äch weli Abdrück gmacht hei. Richtig identifiziere hei mir auerdings nume d Emu-, Eidechsli- und Rossspure chönne.

Nach däm Spaziergang hei mir de no di letschte öppe 100 km bis uf Exmouth in Agriff gnah. Nach dere, für üs ungerdesse, churze Fahrt hei mir üs de im Visitor Centre e Überblick verschafft. Di nächste Täg wärde mir v.a. im Nationalpark am Ningaloo Reef mit Schnorchle verbringe, mau e chli Abwächslig zu fahre u loufe. Im Gägesatz zum Great Barrier Reef isch das Riff diräkt ar Küste u söu öppe gliich schön si, mir wärdes ja de gseh. Da Hotsch weder Toucherbrüue no Flosse het u mir mini aute Flosse z chliin si, isch üses nächste Ziu dr Touchshop gsi. Dert hei mir de näb au dene Sache zuesätzlech no 2 „Wet-Shirts“ gchouft. Nachdäm mir o üsi Vorrät wider ufgstocket hei si mir de uf Internet-Suechi, das mir d Homepage mau ume chöi uf e neusti Stand bringe. Leider isch das hie fasch unmöglech u mir hei de beschlosse de muess das haut paar Täg warte. Sorry das dir drum so lang nüt vo üs ghörit!!!

Entlang vor Küste hets de paar schöni Stops gha unter anderem es Schifffrack diräkt vor dr Küste, e Lüüchtturm u no e chliine Infopavillion wo chli öppis zu de Schiudchrötte verzeut wos da ganz e huufe git.

När hei mir e Camping grad usserhaub vom Nationalpark agstüüret u hei de dr Räscht vom Nami drmit vrbracht am Strand üsi Schnorchu-Sache uszprobiere. Mir hei de o paar verschideni Fische, Seeigle, Muschle u Koralle gseh, abr leider ke Schiudchrott. Schad, abr villech träffe mir ja morn eini.

31.10.2014

Hüt morge hei mir früech zämepackt u si di churzi Strecki zum Afang vom Walk id Schlucht wo mir gester Abe gmacht hei gfahre. Dert hei mir churz üse Rucksack packt u de si mir dr gliich Wäg wi gester wider id Schlucht abe. Dert si mir de abr i di angeri Richtig u si de nach öppe ere Stung wandere u über Steine chraxle bi de Fortescue Falls acho. Dert hei mir nume paar Föteli gmacht u si de no es Stück witer bis zum Fern Pool. I däm ruhige Pool hei mir de immer no relativ früech am Morge es erfrüschends Bad gnah umringt vo paar Flughünd u Papageie und aknabberet vo chliine Fische. ;-) När si mir de di gliichi Strecki ume gmüetlech zrügg glüffe ume zrügg zum Outo. Gester hei mir vom Mitarbeiter vom Informationszäntrum erfahre, dass sit churzem o e angeri Schlucht, Joffre Gorge, iz über e teereti Strass erreichbar isch, drum hei mir üs de entschide, dert ono churz e Blick ga drufwärfe u ev. dert o no e churzi Wanderig zmache. Dert acho hei mir de auerdings vom Lookout us gseh, das dr Wasserfall im Momänt gar ke Wasser het u o ir Schlucht unger hets chum meh Wasser u mer hätt nume bis öppe id Häufti abechönne. Mir hei de beschlosse das mir das löh lah si und stattdesse no möglechst wiit Richtig Exmouth (ganz im Norde vor Westküste, bim Ningaloo Reef) fahre. Nach emene churze Snack hei mir de no e churze, liecht abentüürleche Fotostop gmacht. Abentüürlech v.a. wäg dr Zuefahrtsstrass wo natürlech unteeret, zimlech holperig u am Schluss ono steil gsi isch. Abr mit chli Zigzag uf dr Strass het de o das funktioniert u üses Outo het das brav mitgmacht. Obe acho hets e ganzi Sammlig säuber gmachti Grabsteine gha, wo mir nid so gnau usegfunge hei für was das die si.

Gäge Abe hei mir de gmerkt das es definitiv nüm längt bis uf Exmouth u hei üs uf d Suechi nach ere Übernachtigsmöglechkeit gmacht: am letschte 24h Rastplatz uf em Highway si mir natürlech scho verbi gsi und Zivilisation hets o niene würklech gha. Mir hei de abr es Schiudli entdeckt vomene Camping u si de däm (mau wider uf unteerete Strasse, jaja i weiss mir törfte eigentlech nid…) 2 km entlanggfahre bis mir zumene abglägne Hof cho si. Mir hei dr auerletscht Tag verwütscht wo si no offe hei, bevor d Saison fertig isch u hei de wäg inzwüsche am Abe wider rächt chüehle Temperature sowohl e heissi Duschi gnosse u hei sit langem mau ume üses Schlafzimmer zumene Ässzimmer umbout, wius z’windig und chüehl gsi isch zum dusse ässe. Da üsi Vorrät langsam zur Neige gange si hei mir de chli müesse improvisiere mit em Ässe, abr zum Schluss hei mir feini Teigware mit ere vegetarische Carbonara (mit Spargle statt Späck) zwäg bracht. Chani im Fau empfähle zum mau usprobiere! Schmöckt super!

30.10.2014

Hüt hei mirs chli gmüetlecher lah agah u hei am Morge no chli Föteli usgsuecht für uf d Homepage z’lade. Das dir o öppis drvo heit hei mir die de o wöue ga ufelade, abr komischerwiis macht d Bibliothek am Donnsti viu speter uf u meh aus e Stung hei mir de gliich nid eifach wöue derthocke u warte. Naja, es fingt sech scho wider mau Internet di nächste Täg…

När si mir i Karijini National Park gfahre. E grosse Teil vom Park isch zwar nume mit emene Allrad-Outo z’mache abr es hei üs mehreri Lüüt in Port Hedland gseit, das es o ohni paar schööni Ort git wo sech lohne zum ga aluege. Im Visitor Center hei mir üs de geng wi geng zersch mau über d Gschicht u d Flora und Fauna informiert u hei üs no paar Informatione zu Camping u schöne Wanderwäge lah gäh. När si mir bim Campingplatz verbi u hei fang üses Outo dert abgsteut. När hei mir üses Badzüüg i Rucksack packt u si zum Rand vom Dales Gorge. Vo dert us hei mir de scho paar Lüüt im Wasser gseh bade u hei üs de o uf e Wäg dert häre gmacht. Nach öppe 200-300 m steilem Abstieg und witere 10 min dr Schlucht entlang loufe si mir de a üsem Ziu acho u hei es erfrüschends Bad chönne gniesse. Nach paar Gspräch mit de angere Bsuecher u paar Föteli hei mir de auerdings dr Rückwäg müesse in Agriff näh, das mir zrügg uf e Campingplatz möge bevors dunku isch. Id Schlucht abe isch relativ eifach gsi, abr bis mir ume dobe acho si, si mir doch vei e chli iz Schnuufe cho u hei üs gfragt wi di angere zwöi wo mit üs ufeglüfe si di Strecki über zum Teil lockeri Steine i de Flip Flop chöi mache, während mir äxtra d Wanderschue agleit hei…

29.10.2014

Well mer üs för höt einiges vorgno hend, hets weder einisch es ufstoh vorem Sonneufgang bruucht. Dass es vorem Coral Reef Walk no zomene Zmorge glägt hed, hed sech denn als die rechtigi Entscheidig usegstellt, well mer denn met üsem chline Gröppli vo 6 Lüüt inkl. üsere Führeri de Doris statt de aagäbne Stond grad 3.5 ofem Reef oderwägs gse send. Ond ech schriebe ofem Reef, well mer tatsächlech dank de starche Geziite ond de onmettelbare Nöchi vom Reef, grad ofem Reef hend chönne ome loufe ond Sache entdecke. En chlini Uswahl vo Sache, wo mer gseh hend: Seegurke, -gras, -anemone (met Röckzogsröhre ond anderi), -sterne, -schnägge, -igelschale, diversi Schwömm, Alge, en Tintefisch, en hoorigi Krabbe, Soldatekrabbe, Einsiedlerchrebsli. Osserdem hed de Hotsch vell Ziit gha zom einnigi Sache aazluege ond aazlänge ond d’Kerstin hed dröberus no en Uswahl vo bsondere Moschle ond Schale gsammlet.

Als nöchschts semmer denn zrog is Dorfzentrum bzw. is Hafegebiet. Do hemmer vomene chline Park a de Küste sehr guet chönne die riesige Iseerztransportscheff betrachte ond zueluege wie si belade worde send. Nochher semmer i die lokali Kunstgallerie, wo einigi einheimischi Könstlerinne, eri  Iidröck vo de hiesige Landschaft i Konstwerk hend omgsetz. Näb de Werk vo dene drü Könstlerinne heds no zwe wiiteri Rüüm met Belder vo Aborigines us de Region gäh. Konst liit jo bekannterwiis im Oug vom Betrachter ond dorom hemmer üs degägeentschlosse vo dene eher onkonventionell bonte Belder keis z’erstoh. S’gönstigschte wär met $200 jo no im Rahme gse, aber s’erschte wo mer üs hätte chönne druf einige esch nömm aagschrebe gse bzw. die näbestehende Belder send öber $2000 gse.

Nöchschti Station esch s’Openair Museum zor Minegschecht vo Port Hedland worde. Das Dorf esch jo vonere Minefirma ersch so rechtig gröndet bzw ufbouet worde, wells i de nöchi zo erene Mine ke bessere Hafe gäh hed ond denn hed mer weiserwis entschede, dass mer die Ortschaft grad rechtig usbouet damet dä Hafe ou secher louft ond d’Arbetskräft eim ned ständig devoloufet. Openair esch denn werklech ou so gmeint gse, well das eifach einiges a alter Usröschtig esch, wo hender mannshoche Getter im Frei stod. Wobi vor jedem Grät ein chlin Tafele aabrocht worde esch, wo drof en Teil vo de Bergbaugschecht ond de spezifische Gschecht vo dem Grät stod.

Die zwe letschtePönkt send no en Strandspaziergang am Cemetary Beach gse (E Strand vor de lokale Wohnigsgebiet ond gliichziitig es wechtigs Brüetigsgebiet för Meeresscheldchröt, wo zuefälligerwis ab etz sette aafange ir Nacht eri Näschter cho boue) ond en Bsuech vomene Ussechtsponkt, wo imene Scheff gwedmet esch, wo aafang 20. Johrhondert of de Reis vo Port Hedland noch Broome imene Zyklon spurlos verschwonde esch. Ongefähr s’australische Äquivalent zor Titanic, nor esch das Scheff emmer noni gfonde worde.

Nocheme langersehnte Sprong is Pool ofem Campingplatz heds zom Abschloss no es super Spargelrisotto gäh. Danke Kerstin!

28.10.2014

Nach de dritte Nacht in Broome esch es weder Ziit worde zom wiiterzieh. Aber bevor mer hend chönne die Küstestadt verloh, hemmer no chorz müesse a de sogenannti Kabel-Strand (Cable Beach) go, well das en guete Gägesatz zom mangrove-bewachsene ond schlickbedeckte Ufer, wo mer hend chönne gniesse, seg.

Etz aber los! 600 Kilometer bis Port Hedland send z‘bewältige gse ond för das heds denn inklusive 2 Tankstops en Grossteil vom Tag verschlonge. I de Stadt hemmer denn in geübter Art s’Visitor Center usfendig gmacht, die wechtigste Informatione öber die lokale Sehenswördigkeite iigholte ond de beschti Campingplatz lo empfähle. Bevor mer us Center use send, hed üs en zwöiti Metarbeiteri no of es Coral Reef Survey/Talk/Walk ufmerksam gmacht, wo am nöchste Tag vorem empfohlne Campingplatz wörd afo, well sech dert aaschliessend a Strand grad es Riff befendet.

Bi dere fortgschrettne Ziit hemmer denn nor no ofem Wäg en chline Iichoufsstopp gmacht, bevor mer üs im Camping en gmüetleche Obe gmacht hend.

27.10.2014

Es esch Mäntig ond mer send sehr früeh ufgstande. Das geit wahrschiinlech de meischte lüüt so, aber bi üs esch höt öppis speziells ofem Program gstande. Mer hend müesse die früechi Ebbe verwötsche, well mer nor denn wenn de Wasserstand bsonders tüüf esch, cha die 120 Millione Johr alte Dinosaurierfuessabdröck go aaluege, wo do am Getheaume Point i de Nöchi vomene alte Liechthuus zfende send. Näb de Fuessabdröck hets ou no iidröcklechi Farbe i de Felseklippe gha, wo en sehr idröcklechi Farbekombination metem türkisfarbene Meer ond de grüne Strüücher ergäh hend.

Als nöchschts hemmer üs denn es ongwonnt spots Zmorge gönnt, bevor mer üs ufgmacht hend im Museum no chli öppis meh öber d’Gschecht vo Broome z’erfahre. Erneut hemmer vell öber die vergangeni Perleindustrie gläse ond of Belder gseh, aber ou vo de erschte europäische Bsuecher ond vorallem vell vo de lokale Ereignis währendem 2. Weltkrieg hemmer ghört.

Aaschliessend semmer weder e chli durch d’Hauptstrasse vo Chinatown gschländeret ond no i es paar Gallerie d’Schmuckschöpferkünst im Bereich vo Perleschmuck bewunderet. Zwor send es paar ganz schöni Stöck dronder gse, aber die send denn doch noni im Budget vo 2 Jongarzt vorem erschte Monetslohn gläge.

För de Röckwäg heds denn no es feins Glace usere Ice Creameria gäh – Boyenberries send super als Glace (Neuseeländischer Herkunft ond schmöcke e chli wie Himbeeri. Ofem Wäg semmer denn no am obligatorische 2. WK-sdenkmal verbi cho ondhend no Glägeheit gha, d’Statue, wo im Aadenke a all die velle i de Perleindustrie am Afang meesbruchte/versklavte einheimische Chend ond Froue,  z’betrachte. Osserdem hemmer no chönne die erschtegfallne Kokusnöss vo es paar Palme am Wägrand z’ämeläse. Die hemmer denn met einiger Müeh chönne öffne, was üs en wellkommene Snack und ordentlech Material zom Bastle beschärt hed. För d’Kerstin hets Kokusnossschale zom glattpoliere ond för de Hotsch Rohmaterial för de Schefflibou gäh.

Es guets Z’nacht ond en früechi Bettrue hend denn dä Tag no abgrondet.

26.10.2014

Während Hotsch dr Tag gmüetlech agfange het u no chli im Bett witer tröimet het, isch d Kerstin scho mau ufgstande u het dr Sunneufgang überem Meer gfötelet. Nach emene gmeinsame Zmorge hei mir de dr Bsuech ir Tourist Information no nachegholt u hei üs e grobe Plan für di Ziit in Broome zrächt gleit. Dr Vormittag si mir de dür di rächt grossi Chinatown, wo eigentlech eher e Japanese-Town isch, spaziert u hei üs inere Perlegallerie scho mau es ersts Biud vor Perlestadt Broom gmacht. Leider hei mir nid auzu viu chönne ga aluege, wiu amene Sunnti ir Näbesaison nume wenig Läde offe hei. Für am Namittag hei mir e Füehrig buechet, wo mir 2 vo de Schiff agluegt hei, wo si früecher bruucht hei, zum Muschle uf em Meer ga sammle, bevor dass mer agfange het mit Perlezucht. Am Afang isch es eigentlech gar no nid um d Perle an sich gange, sondern meh um d Muschle, wo mer bruucht het zum Chnöpf für Chleider härzstelle. Ersch nach und nach het sech de d Perleindustrie entwicklet, well nochem 2. Wältchrieg s’Plastik als Rohstof för d’Knöpf cho esch. Bsungers interessant isch o gsi das mir gseh hei mit was für Usrüstig und unter welem Risiko das si das früecher gmacht hei. Mir hei di einzelne Usrüstigsgägeständ o chönne i d’Händ näh u gmerkt was für ne riisigi Belastig di ganzi Usrüstig gsi isch mit öppe 100 kg Gwicht u wi afällig für Unfäll di  ganzi Sach gsi isch. Zum Schluss hei mir de no dörfe di 5. grössti Perle vor Wäut id Finger näh u für die wo, Lust gha hei hets ono z Fleisch vo dere spezielle Muschle-Art zum probiere gäh. Hotsch het drbi nid chönne gnue becho drvo.

När si mir de zrügg uf e Campingplatz u hei d Ebbe gnutzt zum vom Strand us öppe 500 m iz Meer (odr äbe nüm Meer) usezloufe u hei näb diverse Koralle u Einsidlerchräbsli o mehreri Seestärne gfunge.

25.10.2014

Nach dere Nacht umringt vo Wallabies und schüüche Chüe si mir früech ufbroche u nach ere 20-minütige Fahrt im Geiki Gorge National Park acho. Dert hei mir üs Tickets bsorgt für e Bootsfahrt dür d Schlucht. Bevors losgange isch hei mir no churz Ziit gha zum paar Infos zum Park z läse. Da mir ir Näbesaison unterwägs si hets o dasmau nume wenig Lüt gha u mir hei fasch e Privattour gha. In gmüetlechem Tämpo si mir de a dene iidrückleche bis 30 m höche Klippe verbi gfahre u hei anhand vo de Spure uf em Fels chönne gseh wi höch das z Wasser cha stige während dr Rägeziit, nämlech öppe 15 m! Näb 2 Früschwasser-Krokodil und paar Vögu hei mir o no paar interessanti Sache zu de lokale Pflanze erfahre. Bsungers interessant hei mir e Mangrove gfunge wo aus relativ starks abr sehr churz wirksams Lokalanästhetikum wirkt u vo de Aborigines aus Fischfangmethode gnutzt wird, wius d Fische churzfristig lähmt u si de wehrlos ar Oberflächi tribe.

Zum Schluss isch es de dütlech schneller ume zrügg gange, wobi mir d Abchüehlig dür e Fahrtwind dankend agnah hei. Bevor mir de bim Usgangspunkt ume acho si hei mir no e hiuflos im Wasser tribendi Flädermuus iigsammlet u se mitgnah, damit si sech bis am Abe cha erhole, bevor si se wider freilöh.

Nach däm Usflug si mir de no knapp 400 km witergfahre bis uf Broome. Ussert das Hotsch mit em Outo e Griifvogu afahre het, wo nach em Kontakt mit üsere Windschutzschiibe zwar no witer gfloge isch, abr mir nid wüsse was us ihm worde isch, isch di Fahrt sehr ereignislos verlüfe.

In Broome het de Tourist Information leider scho zuegha, drum hei mir üs mithiuf vor Bibliothek (di hei ächt aui gratis Internet!!!) säuber churz informiert u hei de e Campingplatz gfunge mit dr bis iz wiitus beste Ussicht. Mir hei nämlech es Plätzli diräkt am Meer becho mit Usblick über nes chliises Mangrovewäudli, Strand und em Meer. Troumhaft.

Für e Abe hei mir üs no e Fläsche Champagner bsorget u hei de bi üsem Camper es gmüetlechs Apero veranstaltet u uf üsi Prüefige aagstosse. Zum dä Tag no so richtig fiirlech abzschliesse si mir de no zäme imene härzige Restaurant fein ga Znacht ässe.